Jas Geet Lyrics Dukalu Yadav New

महामाई जगमग जोत बरे… (Jas Geet Gana Dukalu Yadav)

जगमग जगमग जोत बरे
महमाई जगमग जोत बरे,
तोर ममता के तोर मया के जग मा अंजोर करे,
जगमग जगमग जोत बर, महामाई जगमग जोत बरे….

नवरातिया के अंजोर मा दाई ममता ला बगराथे वो,
माथ नवा के भगतन तोला मन के मनौती पाथे वो …

नवदुर्गा अनपूर्णा माई-2 नव ठन रूप धरे
जगमग जगमग जोत बरे, महामाई जगमग जोत बरे…. |1|

आदिशक्ति महामाई दाई सबके सहाई वो
संबलपूर समलाई दाई डोंगरगढ़ बमलाई वो…

तोर किरपा ले तोर दया ले-2 सगरो बिपत टरे
जगमग जगमग जोत बरे, महामाई जगमग जोत बरे….|2|

आदि भवानी शीतला रानी तै जग के कल्याणी वो
तोर परताप के तोर शक्ति के नई हे कोनो सानी वो…

बघवा सवारी करके दाई-2 सबके पाप हरे
जगमग जगमग जोत बरे, महामाई जगमग जोत बरे….|3|

बैरी मन ला पापी मन ला रण मा तै हा संहारे वो
अपन भगत के बूड़त नईया छीन भर मा तै उबारे वो

कोसरिया के हिरदे मा,
लाला धनेन्द्र के अंतस मा, तै हा परान भरे,
जगमग जगमग जोत बरे, महामाई जगमग जोत बरे….|4|

गीतकार – लाला धनेन्द्र, स्वर- दुकालू यादव, संगीत- प्राणदीप मानिकपुरी

लागा कईसे चुकांवव..(Dukalu Yadav CG Song Lyrics)

चरण पखारंव पईंया लागंव -2
माथा मैं हा नवावंव,
जिनगी देवईया दाई ददा के
लागा कईसे चुकांवव..

परसव पीरा मा तन ला तपा के, धरती मा वो हा लाथे गा…
नवा जिनगी ला गढ़के संगी, महतारी पद पाथे गा,
आठो काल बारो महीना, खून पसीना बोहाथे गा,
अपन मुँह के कवरा खवाके , बाबू वो हा कहाथे गा…

मान अपमान के मरम सिखईया,
अंधियारी मा रद्दा देखईया,
सबे रूप मा देवता ला पांवव,
माथा मैं हा नवावंव..

धन दौलत सदा संग नई देवय, करनी करम कमाई हे,
दाई दादा के आशीष मुड़ मा, दुख बिपत मा सहाई हे…
सांस के डोरी बंधाये जिंखर ले, जिनगी जिंखर परछाई हे,
जेन ठोकराए दाई दादा ला, ओखर करम करलाई हे…

दाई ददा ले मांग के बाँटा,
झन बोवव जी भाग मा कांटा,
गोठ ला भईया थोरिक तुम पतियावव,
माथा मैं हा नवावंव….

दाई के ममता लिखें ना जाये, महिमा ओखर महान हे,
बाबू के कद हा सरग ले ऊँचा, पौरी मा जेखर जहान हे…
लाला धनेन्द्र अड़हा लईका, लिख के करे गुणगान हे,
कोसरिया हा गोठ ला गाये, सुनय संत सुजान हे…

भाई बहिनी सबो पौरी पर के,
दाई ददा के सेवा कर के
जिनगी ला अपन सरग बनावव,
माथा मैं हा नवावंव.

गीतकार – लाला धनेन्द्र, स्वर- दुकालू यादव, संगीत- कुलदीप राजेश

जस विदाई गीत (Jas Geet Lyrics)

जोर ले जोरन हो

जोर ले जोरन हो,जोर ले जोरन हो
होवत हे विदाई दुर्गा दाई के
नौ दिन आज पुरगे हावय, माता के पहुनाई के

लाली पोलखा,लाली लुगरा,जोरले लाली सेन्दुर हो
लाली चुरी,लाली टिकली,जोरले लाली महुर हो
लाली चुनरिया जोरा जोरले,झांपी म दबाई के

गल के हरवा,झुमका खिनवा,जोरले नाक के नथनी,
कनिहा के करधन,पांव पइजन,जोरले बहुटा ककनी
दसमत बिछियां अऊ मुदरिया,जोर ले दुर्गा माई के

पान सुपारी, मिठाई जोर ले,जोर ले पताका तोरन
काजर के ग डबिया जोरले,जोरले छोटकुन दरपन
नंदगइहा भाव भगती जोरे,आंसू ल ढ़रकाई के

Jas Geet Lyrics Likha Hua

गीतकार – नंदकुमार वर्मा नंदगइहा, स्वर- दुकालू यादव, संगीत- प्राणदीप मानिकपुरी

cg songs download

Video Link

Jas Geet Likha Hua

जोत जवारा निकलय…(Jawara Visarjan Jas Geet Dukalu Yadav)

जोत जवारा निकलय,निकलय
जोत जवारा निकलय
आसन ले माता उसलय,उसलय
आसन ले माता उसलय

लक लक जोत ह करे,चले भवानी सगरी में
जोरन जोरा ह जोराये,बंधाये सबो गठरी में
पारा पारा म किजरय,किंजरय
पारा पारा म किंजरय
आसन ले माता उसलय…..

बाना ल धरके बरुवा नाचे,नाचे झुमर झुमर के
लिबूवा ल भारे बइगा रेंगे, माता ल सुमर सुमर के
नर नारी पानी ओरसय,ओरसय
नर नारी पानी ओरसय
आसन ले माता उसलय…..

मन मोरे हुलसे जाथय,कलपत हे भारी ओ
तर तर नयना ले बोहाये,आंसु के धारी ओ
नंदगईहा जस लिखय,जसलिखय
आसन ले माता उसलय……

गीतकार – नंदकुमार वर्मा नंदगइहा, स्वर- दुकालू यादव, संगीत- प्राणदीप मानिकपुरी